Bratte fjellsider og brearmar, fredleg fiske og fjellvandring. Eit levande lokalsamfunn gjev ein positiv atmosfære. Finn roen i det storslåtte og ville!

Jostedalen - den fredfulle dalen i ly av Jostedalsbreen.



Storsamfunnet har sett verdien av den storslåtte naturen vår, og i vest har me Jostedalsbreen Nasjonalpark og i aust skal me få eit stort nytt verneområde, Breheimen Nasjonalpark. Brear, fjelltoppar, ei brusande elv og fjellvatn med aure og ry, den levande bygda med rikeleg med snø om vinteren. Jostedalen er den perfekte plassen for deg som vil finne roen. Ei hyggjeleg atmosfære set sitt preg bygda som no vil ynskje hyttefolket velkommen!

Me ligg og sentralt i forhold til ulike aktivitetar: Kajakkpadling både på brevatn og i fjorden, brevandring, klatring, turstiar og vinteraktivitetar med skiløyper, skitrekk, toppturar og isklatring.


Litt om Jostedalen

Jostedalen strekkjer seg ca 50 km nordover frå Lustrafjorden ved Gaupne i Indre Sogn. Jostedal var eigen kommune fram til 1963 og har sidan vore ein del av Luster kommune. Bygda har i dag kring 450 innbyggjarar – heile kommunen har kring 5000.

Kva lever folk av i Jostedalen?
Primærnæringane har vore viktige opp gjennom tidene. No er talet på heiltidsbønder sterkt redusert, og mange av innbyggjarane har jobben sin utanfor bygda.
Men vi har også ein del bedrifter i bygda, som Jostedal Industrier (lagar operasjonsbord for sjukehus), BioNordic (lagar pelletsomnar) Jostedal Hotell, Breheimsenteret, Thor Bakkens Eftf., Jostedal Kraftverk og Einar’s Snekkarverkstad.

Turisme
Turismen har etter kvart vorte både større og viktigare for lokalsamfunnet i Jostedalen.Jostedalen og Jostedalsbreen er av dei mest verdsette turistmåla i landet vårt. Jostedalsbreen er den største isbreen på det europeiske fastlandet med eit flatemål på ca 470 kvadratkilometer. Den mest kjende brearmen i Jostedalen er Nigardsbreen som kvart år er besøkt av over 40 000 turistar frå inn- og utland.

Jostedalen Breførarlag har eit allsidig tilbod til dei som er interesserte i bre- og fjellvandring.

Jostedalsrypa er velkjend i Noreg. Segna om den vesle jenta frå Bjørkehaug som var einaste overlevande i Jostedalen etter Svartedauden, har vore tema for både bøker og filmar. Båten som fører turstane over brevatnet, har fått namn etter denne segna og heiter då naturlegvis Jostedalsrypa.
  Breheimsenteret
Breheimsenteret har status som Nasjonalparksenter og inneheld mellom anna ei utstilling av svært høg standard om breen, utviklinga av breen gjennom ulike tidsaldrar og kulturhistorie. I tillegg inneheld senteret både kafe og kinosal.

Servicefunksjonar
Det er to campingplassar i bygda, ein ved Breheimsenteret og ein på Gjerde. På Gjerde, bygdesenteret i Jostedalen, finn ein Jostedal Hotell, daglegvarebutikk, bensinstasjon og campingplass. I hotellet ligg ein triveleg kafe som er fast møteplass for bygdefolk og turistar året gjennom. Gjerde ligg ca. 5 km frå Nigardsbreen og Bergsetbreen.

Barnehage, skule og samfunnshus
Desse tre viktige institusjonane i Jostedalen ligg ved kvarandre i Krekane, ca. 5 km sør for Gjerde. Jostedal skule har 1. til 7. klasse og ca. 30 born. I Jostedal samfunnshus er det symjehall og ei rad aktivitetar året gjennom som organisert trim, bading, møte, festar, kulturtilstellingar og andre arrangement.

 

.